Circuíto permanente de ciclocrós en Santiago de Compostela

Abstract

[Resumo:] O ciclismo é un dos deportes máis populares e practicados do mundo e a nivel galego tamén goza de boa popularidade, sendo a 5ª comunidade autónoma en número de ciclistas. A pesar dos números sen dúbida positivos as infraestruturas son inexistentes. Noutras zonas con climas húmidos semellantes ao galego como poden ser Reino Unido, Francia e, especialmente, Bélxica e os Países Baixos, destacan a celebración de “clásicas” e carreiras de ciclocrós no inverno, onde acadan unha popularidade equiparable á do fútbol, sendo ademais dun deporte saudable un polo xerador de emprego. Durante os últimos anos foron numerosos os investimentos para traer etapas da Vuelta a España a distintos puntos da xeografía galega, mais estes investimentos tiveron meramente unha compoñente turística e non se involucraron en crear base ciclista. Para dar un impulso ao ciclismo nunha modalidade pouco coñecida mais con gran potencial no noso país créase esta proposta de circuíto permanente de ciclocrós, sendo a primeira infraestrutura do mundo proxectada para tal fin. A proposta de crear un circuíto permanente ten dúas finalidades, por unha banda dotar esta modalidade deportiva dun lugar onde practicar o deporte en condicións de seguridade e por outra banda prepararse para acoller competicións do máis alto nivel que promocionen tanto o deporte no noso país como o noso país ante todas as seguidoras deste deporte no mundo. Para o emprazamento do proxecto elixiuse Santiago de Compostela polo seu carácter xeográfico máis central e mellor comunicado co resto de cidades, tendo ademais nas proximidades capacidade de aloxamento máis que suficiente para acoller as competicións. En canto á parcela, localízase nunha zona actualmente sen uso propiedade da Administración Pública, estando nas aforas da cidade pero ben comunicada, cunha orografía suave pero continuamente variable que contribúen a deseñar un percorrido variado, o cal ademais non está condicionado por cursos de auga.