Araceli Herrero Figueroa in memoriam

Abstract

[Resumo] Este estudo, con que finaliza a incursión crítica de Araceli Herrero Figueroa na obra pardobazaniana, está precedido doutros máis, en número de cinco, do maior interese: sobre a crítica a Rosalía de Castro; o tratamento da muller galega; a discutíbel lusofilia da escritora; a súa benvida-relación co cinematógrafo, e a análise do corpus contístico. De certo que Araceli sería colaboradora entusiasta desta revista, La Tribuna, se a súa prematura morte non a tivese levado tan tristemente. Sirvan estas sinxelas liñas para mantérmola na nosa recordación e no noso afecto, tal e como exteriorizan as nada menos que setenta colaboracións que integran o volume O sorriso de Lilí, organizado e disposto por Xulio Xiz, publicado no verán de 2021 e editado polo Colectivo Egeria. Tamén ela foi viaxeira libre e afouta polo espazo das nosas letras, a cuxa elevación contribuíu durante toda a súa vida, como docente, investigadora e ensaísta. Descanse en paz