Levar a poesía á rúa. As Edicións do Dragón na traxectoria de Paco Souto e no sistema poético galego dos 90

Abstract

[Resumo] O presente traballo consiste nunha análise da traxectoria do poeta Paco Souto e da súa implicación no proxecto editorial das Edicións do Dragón (a partir de agora, ED), o cal tamén será albo de estudo para determinar a súa repercusión nos campos literario e editorial galegos. Así, foron estabelecidos os seguintes obxectivos: 1) Reconstruír o percorrido literario, cultural e político de Paco Souto e avaliar a súa relevancia no sistema literario galego contemporáneo; e 2) Coñecer en profundidade o proxecto das ED para identificar as súas funcións e avaliar a súa influencia tanto na traxectoria de Paco Souto como no sistema literario galego de finais do século XX. Canto á metodoloxía, aplicamos unha focaxe de tipo sistémico que nos permitiu inferir a posición periférica ocupada tanto polo autor como polo proxecto editorial no seu momento, así como a súa posterior marxinación no cánone. Esta mesma metodoloxía posibilitounos reconstruír a traxectoria poética de Paco Souto e, a partir dunha base documental e dunha perspectiva analítica, presentamos as condicións institucionais da editora, os axentes que nela participaron e unhas liñas fundamentais dos seus repertorios. O traballo foi estruturado da seguinte forma: primeiro, partindo dos estudos previos, expúxose o estado da cuestión, isto é, o coñecemento construído que existe sobre Paco Souto e sobre as ED. A seguir, dedicouse un capítulo a abordar a traxectoria do autor no sistema cultural galego en que se atendeu tanto á súa produción poética como á súa implicación política e cultural. Finalmente, presentouse unha análise das ED a partir da descrición pormenorizada de cada un dos volumes publicados. Estes procesos permitíronnos obter varias conclusións. Por unha parte, observamos a clara implicación de Paco Souto no mundo cultural galego e en determinadas causas sociais, pois o autor concibía a poesía como un poderoso instrumento de cambio que pretendía achegar ao pobo e levar á rúa. Por outra parte, puidemos corroborar o papel central desenvolvido por Paco Souto na creación e desenvolvemento das ED. Finalmente, tamén constatamos a notábel repercusión que as ED exerceron nos campos literario e editorial posteriores, especialmente no ámbito da poesía, así como o relevante espazo que conformou para voces poéticas noveles que serían recoñecidas pola crítica como integrantes da poesía dos 90.