Vilanova de Castro

Abstract

Vilanova de Castro é un falso documental que trata dunha vila ficticia na que o goberno local dende hai 20 anos é de ideoloxía comunista. Pese a isto, a maioría da poboación é de clase social alta e a súa renta per cápita é das máis altas de España. A historia comeza cando un xornalista dunha pequena televisión do norte de España desprázase a esta vila para realizar unha reportaxe de este fenómeno. A peza combina crítica e sátira social e política xogando con recursos típicos do documental e coa estrutura formal deste, baseándose puramente en testemuñas e entrevistas a personaxes relevantes. Para iso comeza entrevistando á directora do instituto local, a algúns estudantes, etc. pero tamén a personaxes máis pintorescos e caricaturescos como Renaldinho (xogador do equipo de fútbol do pobo cun pasado como xogador de elite na primeira división portuguesa) ou Jean Piere (un pintor francés que se trasladou ao pobo en busca de inspiración). Esta serie de entrevistas inclúen ao propio alcalde deste pobo ficticio, que a través do seu carisma e bos resultados electorais conseguiu gobernar durante 20 anos a vila. Mediante o uso desta narrativa de falso documental, a audiencia percibe o narrado como máis verosímil e realista ao ser unha linguaxe que consume a diario tanto a través da televisión como de documentais de longa duración.