As intelixencias artificiais como xeradoras de cultura. Exploración dos nesgos de xénero de ChatGPT

Abstract

[Resumo] Cada vez son máis os sistemas baseados en intelixencia artificial que xeran contido destinado a ser consumido polas persoas, incorporado ao mundo online en diferentes formas (texto, imaxes, sons, etc.). Este contido sintético ofrece moitas posibilidades, mais tamén moitas preguntas. Neste traballo focámonos nas IA xeradoras de linguaxe, nomeadamente as LLM (Large Language Models), especializadas na produción de lingua escrita. Sabemos que diferentes grupos con diferentes contextos culturais teñen diferentes modelos da linguaxe, polo que consideramos interesante reflexionar sobre o que supón a popularización destas IAs (LLMs) en relación á lingua que crean, e á posibilidade de teren un modelo propio, e os xeitos nos que este poida manifestarse. Como xeito de explorar este aspecto, procuramos visibilizar esa posible manifestación a través dunha serie de preguntas guiadas, relacionadas coas mulleres e o eido STEM (Science, Technology, Engineering, Math). A intención é, tendo presentes os perigos que os nesgos nos grandes sistemas baseados en IA supoñen, validarmos o seu posible impacto na produción de contido e, por extensión, nas crenzas e comportamentos das persoas