Unha aproximación ao proceso da transmisión interxeracional do galego desde a variábel xénero: prexuízos, ideoloxía e ruptura

Abstract

[Resumo] O obxectivo principal deste traballo é analizar a situación sociolingüística da Galiza poñendo o foco de interese na variábel xénero para aproximarnos ás estratexias das políticas lingüísticas familiares das galegas e dos galegos e dar así explicación á ruptura do proceso de transmisión interxeracional do galego. A metodoloxía empregada foi a análise de tipo cuantitativo, xa que se realizaron 323 inquéritos por parte da mocidade galega a través das redes sociais dixitais. O traballo está dividido en dúas seccións ben diferenciadas. A primeira, permítenos achegarnos á historia do galego e do xénero feminino e denunciar a subordinación paralela que desde hai séculos están sometidas. A segunda, proponse a análise dos resultados das informantes e dos informantes que xiran arredor dos seus usos e actitudes lingüísticas, e que nos permiten analizar aqueles prexuízos lingüísticos e os estereotipos de xénero, mais tamén reinantes entre a mocidade galega. Unha vez realizada a análise, constátase que a variábel xénero é un factor relevante na ruptura da transmisión interxeracional do galego e que o país precisa de políticas lingüísticas e de igualdade á altura da nosa lingua e do noso pobo