A voz velada dos outros: Achegamento ao papel dos amigos na cantiga de amor

Abstract

[Resumo] O traballo analiza, a través dun corpus representativo de textos pertencentes ao xénero de amor galego-portugués, o modo en que se nos trasladan as palabras ou preguntas dos amigos do trobador, así como o papel que estes desenvolven no seu comportamento a respecto da dama e nas eventuais desviacións e variacións do motivo. Trátase dun discurso que comparece habitualmente de maneira indirecta, a través das palabras do propio suxeito poético, e que adoita poñer de manifesto a curiosidade case irreverente deses amigos, o desexo que estes teñen de coñecer a identidade da senhor, e que os leva a preguntarlle ao namorado quen é a muller pola que morre de amor, ao cal el debe –atendendo aos códigos xenéricos– responder coa lei do silencio; con todo, este código é por veces aparentemente transgredido e o propio namorado xoga coa posibilidade de revelar a identidade da súa senhor. Noutras ocasións, a voz dos amigos cumpre un claro papel antagónico aos sentimentos do poeta-namorado, ao lle aconsellar, por exemplo, que non sirva á súa dama.