Lírica medieval galego-portuguesa e neotrobadorismo na "época Nós": Coordenadas da poesía de Fermín Bouza Brey

Abstract

[Resumo] Este traballo pretende trazar as coordenadas histórico-literarias en que xorde o movemento poético coñecido como neotrobadorismo, con especial atención á poesía de Fermín Bouza Brey. Dunha parte, investígase a difusión real da lírica trobadoresca medieval na Galiza do primeiro terzo do século XX, relacionando a atención que se lle prestou cos intereses ideolóxicos do nacionalismo galego. Doutra, aténdese á posibilidade de que a boa acollida do neotrobadorismo ensaiado por Bouza Brey na década dos vinte se debese a ofrecer unha alternativa poética ás vangardas, autenticamente galega á par que moderna.