Premios Isabel Zendal de promoción do pensamento crítico en Educación Secundaria e Bacharelato. VII Edición

Abstract

Os Premios Isabel Zendal recollen o talento e a creatividade da mocidade, e seguen a inspirar nas novas xeracións un espírito curioso, reflexivo e comprometido coa ciencia e a sociedade. O certame, impulsado pola Universidade da Coruña, a través da Unidade de Divulgación Científica e Cultural, e en colaboración co Círculo Escéptico e a Deputación da Coruña, está dirixido ao alumnado escolarizado en centros educativos españois desde o primeiro curso da educación secundaria obrigatoria (ESO) ata o segundo curso de bacharelato, de modo que consta de dúas categorías de participación: unha para o alumnado de 1.º a 3.º curso da ESO e FP básica; e outra para o alumnado de 4.º da ESO a 2.º de bacharelato e mais dos ciclos formativos de grao medio Nesta convocatoria recibíronse 25 propostas, 10 correspondes á categoría A e 15 á categoría B. Entre as distintas modalidades de participación –artigo xornalístico, exposición divulgativa dun experimento desenvolvido polo alumnado, conto ou relato curto–, foi esta última o que tivo maior presenza, consolidándose como formato preferido polos participantes. Os traballos presentados integran valores esenciais do pensamento científico e humanista: o escepticismo racional, a perspectiva de xénero, o respecto polos feitos contrastados e a defensa da verdade fronte ás pseudociencias e a desinformación. Moitos relatos, ademais, amosan unha sensibilidade especial cara ás desigualdades sociais e cara ás violencias que afectan a mulleres, persoas LGTBIQ+ ou inmigrantes, entre outros, ofrecendo unha mirada crítica e solidaria sobre o noso tempo.