Proxección autoral das poetas galegas nas redes sociais dixitais. Aproximación a catro casos representativos: Helena Villar Janeiro, Dores Tembrás, Afra Torrado e Estíbaliz Espinosa Río

Abstract

[Resumo] A consolidación das Redes Social Dixitais facilita a comunicación e a relación entre as persoas, ao tempo que supón a creación dun novo espazo público para a (re)presentación do Eu, en moitas ocasións, cun carácter performativo. Estas plataformas contribúen a mudar a co-construción da imaxe autoral e os axentes que nela interveñen, favorecen a mobilidade entre as esferas pública e privada e, por conseguinte, constitúen o medio a través do que as autoras poden reclamar e recuperar o seu lugar no sistema literario. No noso traballo analizamos a proxección autoral de catro poetas galegas contemporáneas e a utilización que elas fan de plataformas como Facebook, Instagram ou Twitter para se (re)presentar ante a mirada dunha audiencia múltiple e heteroxénea e o seu uso coa finalidade de crearen un espazo (auto)biográfico cohesivo para a elaboración e recuperación da memoria individual e colectiva. As autoras empregarán estas esferas públicas conectadas como lugares de ciber-activismo e empoderamento co obxectivo final de-construíren o discurso hexemónico.