Senda litoral entre Traba (Laxe) e Camelle (Camariñas)

Abstract

[Resumo:] Nos últimos tempos, o acercamento ao medio natural é cada vez máis forte. Este aumento da demanda de turismo de natureza fai que cada vez se realicen un maior número de proxectos dedicados á súa potenciación como é o caso aquí presente. Co actual proxecto preténdese a rehabilitación dunha antiga senda entre as localidades de Traba (Concello de Laxe) e Camelle (Concello de Camariñas), pasando por Sabadelle (Concello de Vimianzo). A restauración desta senda pon en valor o patrimonio etnográfico e natural presente, tanto na zona de actuación coma na Costa da Morte, onde se atopan: valados, rodeiras e ruínas dunha antiga casa fidalga na zona do Coído de Sabadelle, como representación do patrimonio etnográfico do lugar, e os Penedos Costeiros de Traba e o conxunto da Praia e Lagoa de Traba, como representación do patrimonio natural presente na zona. Esta actuación crea unha alternativa ao transporte en vehículo privado facendo a comunicación entre localidades máis sostible, o cal pode ser extrapolable a outros lugares da Costa da Morte o que conlevará á creación de camiños e sendas litorais, que conseguirán un maior atractivo para a zona e unha mellor perspectiva de futuro a nivel socio-económico.