Xornadas 8M. Mulleres e independencia económica: traballo e sociedade en perspectiva histórica

Abstract

[Resumo] Co gallo da conmemoración do 8M, a Oficina para a Igualdade de Xénero (OIX) da Facultade de Economía e Empresa (FEE) da Universidade da Coruña (UDC) organizou no ano 2024 unhas xornadas centradas nas Mulleres e independencia económica. Estas xornadas levaban por subtítulo Traballo e sociedade en perspectiva histórica, xa que a participación laboral e a conquista dos espazos sociais por parte das mulleres están ligados. Estes aspectos abordáronse dende a perspectiva histórica para tratar de amosar que foron avances lentos e nos que, en moitas ocasións, houbo retrocesos. Dende as institucións é fundamental continuar traballando na concienciación da participación das mulleres no mercado laboral como factor para o crecemento económico e para o benestar, tanto a nivel xeral, como a título particular. Non só iso, senón que cómpre rachar coas ideas preconcibidas e os estereotipos sobre a devandita participación laboral emanados dende o cinema, as redes sociais e outros medios de entretemento. Especialmente aqueles que sitúan á muller como persoa inactiva no eido laboral, demostrando que traballaron de xeito activo, malia que, maioritariamente, no mercado laboral informal. Deste xeito, non só se eliminan representacións das mulleres erróneas, senón que ao mesmo tempo se aportan referentes para as novas xeracións.