Exploración da identidade ocupacional con dependencia ao alcohol

Abstract

Obxectivos: Explorar a construción da identidade ocupacional nas persoas con dependencia ao alcohol, achegándose as súas experiencias e vivencias persoais, identificando e afondando nos aspectos que axudan a conformar esta identidade, e indagando nas posibles relacións entre a dependencia ao alcohol e o nivel de desempeño ocupacional, a construción da identidade ocupacional e o benestar e a saúde. Metodoloxía: Investigación cualitativa de enfoque fenomenolóxico cunha mostra de 11 persoas con dependencia ao alcohol, pertencentes a dúas asociacións da cidade da Coruña. Empregáronse como técnicas de recollida de datos: a entrevista, a observación non participante e a lectura de documentos. Resultados: As categorías de significado que explican o fenómeno preséntanse divididas en tres períodos. En “Antes do consumo” percíbese a disfunción no contexto da infancia e a tradición social do alcohol. “Durante a dependencia” comprende a negación da enfermidade, os sentimentos de culpa e a rutina do alcohol. Na “Rehabilitación”, aparece a adopción da identidade de alcohólico, a liberdade ao non consumir, a prioridade de non beber e a influencia da institución. Conclusións: A identidade ocupacional da persoa vese alterada polo alcoholismo, xa que se ven afectadas ocupacións significativas en favor do consumo. A construción da identidade de persoa alcohólica destaca por riba dos outros aspectos da identidade da persoa. A medida que a persoa non consume, recupera liberdade e capacidade de elección na súa vida, mellorando a autoestima e o autoconcepto.