Informe sobre usos lingüísticos no teatro galego

Abstract

[Resumo] Ao abeiro dun convenio de colaboración para actuacións en materia de normalización lingüística entre a Consellería de Cultura, Educación e Universidade e a Universidade da Coruña, en 2022 iniciouse un proceso masivo de enquisas ás persoas que integran os diferentes sectores envolvidos na creación, distribución e recepción da produción espectacular galega. Dos cinco sectores inicialmente estabelecidos -dramaturg@s, intérpretes, director@s, programador@s e público-, unicamente puideron ser inquiridos os catro primeiros, visto que non resultou factíbel a recolla da opinións das e dos espectadores cos medios do Grupo ILLA da UDC e a Academia Galega de Teatro. Este ambicioso inquérito estendeuse até inicios do ano 2024 e foi realizado maioritariamente por vía telefónica -se ben tamén se recolleu información por correo electrónico. Esta función foi asumida polas bolseiras Fátima Novo Díaz, Marta Torrado Carollo e Romina Pereira Trillo, ás que se sumou o tamén bolseiro Óscar Pérez Vila -quen se encargou do deseño da aplicación de procesado dos resultados. Elas propias coadxuvaron no deseño das preguntas, nun proceso supervisado polo coordinador e o asesor de contidos do Observatorio -respectivamente, Carlos-Caetano Biscainho-Fernandes e Francisco Oti Ríos.