Efecto dun microcontaminante acuático sobre un microorganismo fotosintético

Abstract

[Resumo]O uso intensivo e extensivo de herbicidas pode provocar a contaminación dos medios acuáticos, afectando a calidade da auga e prexudicando ós organismos non diana, como son as microalgas. No presente estudo analizáronse os efectos do herbicida bipiridílico paraquat na microalga de auga doce Chlamydomonas reinhardtii a nivel do crecemento e do contido celular de pigmentos fotosintéticos e proteínas. Os resultados obtidos mostran que a exposición ó paraquat provoca alteracións significativas sobre o crecemento de C. reinhardtii. A taxa de crecemento da microalga é afectada negativamente de maneira dependente da concentración e do tempo de exposición, obténdose un valor de EC50 de 107,57 nM tras 96 horas de exposición. O contido celular de pigmentos e proteínas tamén se ve afectado, decrecendo significativamente en cultivos expostos ás concentracións máis altas ensaidas de paraquat tras 96 horas de exposición, o que pode ser debido ó mecanismo de acción do herbicida que provocaría a súa degradación oxidativa. Tamén se analizaron os posibles cambios no efecto tóxico do paraquat sobre a microalga C. reinhardtii en función de si estivo exposta previamente ó herbicida; este obxectivo abordouse mediante o estudo do crecemento e outros parámetros celulares analizados mediante citometría de fluxo, como o tamaño das células, a autofluorescencia da clorofila a e a viabilidade celular. A pre-exposición da microalga ó herbicida reduce o efecto negativo do mesmo cando C. reinhardtii se expón a novos aportes deste praguicida. Isto podería indicar que a exposición ó paraquat induce en C. reinhardtii certas adaptacións fisiolóxicas que aumentan a tolerancia desta microalga ante o efecto tóxico do herbicida, particularmente a nivel de parámetros como o crecemento, autofluorescencia da clorofila a e a viabilidade celular dos cultivos.